Sığortalı Azərbaycan xəbər verir ki, Azərbaycanda barələrində məlumatların məxfiləşdirilməsi nəzərdə tutulan sığorta olunanlara unikal kod verilməsi ilə bağlı yeni prosedur müəyyənləşdirilib.
Nazirlər Kabinetinin qərarı ilə “Sığortalıların təqdim etdiyi məlumatlar əsasında sığorta olunanların və sığortalıların sığortaçıda uçotu Qaydası” təsdiqlənib.
Yeni qayda istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta fəaliyyəti çərçivəsində sığortalıların təqdim etdiyi məlumatlar əsasında sığorta olunanların və sığortalıların sığortaçıda uçotunun təşkilati və hüquqi əsaslarını müəyyən edir.
Sığortalılar barədə hansı məlumatlar qeydə alınacaq?
Qaydaya əsasən, sığortaçıda sığortalılarla bağlı bir sıra məlumatlar uçota alınacaq.
Bura sığortalının adı, VÖEN-i və verilmə tarixi, hüquqi və faktiki ünvanı, əlaqə nömrəsi, həmçinin icbari sığortanın təmin edilməsinin Fond tərəfindən həyata keçirilməsinə başlandığı tarix daxildir.
Bundan başqa, sığortalının yenidən təşkili və ləğv edilməsi tarixləri, sığorta haqları üzrə büdcə ilinin əvvəlinə hesablanmış, ödənilmiş və qalıq məbləğlər, artıq ödənilmiş sığorta haqqı barədə məlumatlar da qeydə alınacaq.
Sığortalının yenidən təşkili nəticəsində hüquqi varis kimi müəyyən edilmiş yeni sığortalıya transfer olunan ödənilmiş sığorta haqlarının məbləği və artıq ödənilmiş sığorta haqqının Fond tərəfindən qaytarılmış məbləği də uçot məlumatlarına daxil ediləcək.
Unikal kod kimlərə veriləcək?
Qayda ilə barələrində məlumatların məxfiləşdirilməsi nəzərdə tutulan sığorta olunanlar üçün unikal kodun alınması proseduru da müəyyənləşdirilib.
Bu kateqoriyaya Daxili İşlər Nazirliyinin və Dövlət Təhlükəsizliyi Xidmətinin əməkdaşları, Xarici Kəşfiyyat Xidməti, Dövlət Mühafizə Xidməti və Xüsusi Rabitə və İnformasiya Təhlükəsizliyi Dövlət Xidmətinin “Dövlət sirri haqqında” qanuna uyğun olaraq barələrində məlumatların məxfiləşdirilməsi nəzərdə tutulan mülki işçiləri daxildir.
Daxili İşlər Nazirliyinin və Dövlət Təhlükəsizliyi Xidmətinin əmək müqaviləsi elektron informasiya sistemində elektron sənəd formasında bağlanan işçiləri isə bu kateqoriyaya daxil edilmir.
Unikal kodun alınması üçün 5 iş günü müddət verilir
Qaydaya əsasən, qeyd olunan sığorta olunanların hər biri üçün unikal kodun alınması məqsədilə sığortalı həmin şəxslərin işə başladığı tarixdən etibarən 5 iş günü ərzində sığortaçıya müraciət etməlidir.
Sığortaçı daxil olan müraciətə 15 iş günü müddətində baxaraq müraciətdə göstərilən sığorta olunanların sayına uyğun unikal kodların verilməsini təmin edəcək.
Verilən kodlar kağız daşıyıcıda, elektron daşıyıcı əlavə edilməklə, sığortalıya göndəriləcək.
Əmək münasibətləri başa çatdıqda kod ləğv ediləcək
Barəsində məlumatların məxfiləşdirilməsi nəzərdə tutulan sığorta olunanla əmək müqaviləsinə və ya mülki-hüquqi müqavilə əsasında davam edən münasibətə xitam verildikdə, sığortalı sığortaçıya yazılı müraciət etməlidir.
Müraciət həmin sığorta olunana verilmiş unikal kodun ləğv edilməsi məqsədilə göndəriləcək.
Dövlət qurumları üçün də müddət müəyyənləşdirilib
Daxili İşlər Nazirliyi, Dövlət Təhlükəsizliyi Xidməti, Xarici Kəşfiyyat Xidməti, Dövlət Mühafizə Xidməti və Xüsusi Rabitə və İnformasiya Təhlükəsizliyi Dövlət Xidməti qərar qüvvəyə mindiyi tarixdən etibarən 15 iş günü müddətində Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fonduna müraciət etməlidirlər.
Əmək və Əhalinin Sosial Müdafiəsi Nazirliyi isə qeyd olunan dövlət qurumlarının müraciətləri daxil olduğu tarixdən etibarən 1 ay müddətində barələrində məlumatların məxfiləşdirilməsi nəzərdə tutulan hər bir sığorta olunana Dövlət Sosial Müdafiə Fondu tərəfindən unikal kod verilməsini təmin etməlidir.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
