Azərbaycanda sığorta olunanların uçotu ilə bağlı yeni qaydalar müəyyənləşdirilib. Nazirlər Kabineti sığortalıların təqdim etdiyi məlumatlar əsasında sığorta olunanların və sığortalıların sığortaçıda uçotunun aparılması qaydasını təsdiqləyib.
Sığortalı Azərbaycan xəbər verir ki, bununla bağlı Baş nazir Əli Əsədov müvafiq qərar imzalayıb.
Sığortalılarla bağlı hansı məlumatlar uçota alınacaq?
Yeni qaydalara əsasən, sığortaçıda sığortalı barədə qeydə alınan uçot məlumatlarına aşağıdakılar daxildir:
- sığortalının adı;
- vergi ödəyicisinin eyniləşdirmə nömrəsi (VÖEN) və onun verilmə tarixi;
- sığortalının hüquqi və faktiki ünvanı, həmçinin əlaqə nömrəsi;
- sığortalıya münasibətdə icbari sığortanın təmin edilməsinin Fond tərəfindən həyata keçirilməsinə başlandığı tarix;
- sığortalının yenidən təşkili və ləğv edilməsi tarixləri barədə məlumatlar;
- sığorta haqları üzrə büdcə ilinin əvvəlinə hesablanmış, ödənilmiş və qalıq məbləğlər;
- artıq ödənilmiş sığorta haqqı;
- sığortalının yenidən təşkili nəticəsində hüquqi varis kimi müəyyən edilən yeni sığortalıya və ya sığortalılara transfer olunan ödənilmiş sığorta haqlarının məbləği;
- artıq ödənilmiş sığorta haqqının Fond tərəfindən qaytarılmış məbləği.
İcbari sığorta üzrə yeni qaydalar təsdiqlənib
Nazirlər Kabineti bununla yanaşı, “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” Qanunun 2-1.1-ci maddəsində nəzərdə tutulan digər iki qaydanı da təsdiqləyib.
Bunlardan biri sığorta olunanlara münasibətdə sığorta məbləğinin müəyyənləşdirilməsi Qaydası, digəri isə sığorta olunanların icbari sığortası üzrə sığorta ödənişinin məbləği və verilməsi Qaydasıdır.
Yeni tənzimləmə dövlət orqanlarında və bələdiyyələrdə çalışan şəxslərə, dövlət və ya bələdiyyə mülkiyyətində olan, yaxud nizamnamə kapitalındakı nəzarət zərfi dövlətə və ya bələdiyyəyə məxsus hüquqi şəxslərdə çalışanlara da şamil olunur.
Həmçinin dövlət adından yaradılan publik hüquqi şəxslərdə və büdcə təşkilatlarında çalışan şəxslər, istehsalat təcrübəsi və ya təlim keçən tələbə və şagirdlər, eləcə də könüllü fəaliyyət iştirakçıları da bu çərçivəyə daxildir.
Sığorta vəsaitinin formalaşdırılması qaydası müəyyənləşib
Hökumət eyni zamanda “Sığorta vəsaitindən, o cümlədən sığorta ehtiyatı fondundan istifadə qaydası”nı təsdiqləyib.
Qaydalara əsasən, sığorta vəsaiti bir neçə mənbə hesabına formalaşdırılacaq. Bunlara qanunun 2-1.1-ci maddəsində nəzərdə tutulan sığorta olunanlar üzrə ödənilən sığorta haqları daxildir.
Sığorta ehtiyatı fondunu təmin edən vəsaitlərin banklarda depozitə yerləşdirilməsindən əldə edilən gəlirlər də sığorta vəsaitinin mənbələrindən biri olacaq.
Bu vəsaitlər yalnız müəyyən təhlükəsizlik meyarlarına cavab verən banklarda yerləşdirilə bilər. Belə banklara beynəlxalq reytinq agentlikləri tərəfindən Azərbaycan üzrə verilmiş reytinqdən maksimum iki pillə aşağı reytinqə malik banklar və Azərbaycanda fəaliyyət göstərən sistem əhəmiyyətli banklar daxildir.
Qanunvericilikdə nəzərdə tutulan digər mənbələr də sığorta vəsaitinin formalaşdırılmasında istifadə ediləcək.
Sığorta haqlarının 5%-dək hissəsi ehtiyat fonduna yönəldiləcək
Yeni qaydalara əsasən, sığorta haqlarının 5%-dək hissəsi sığorta ehtiyatı fonduna yönəldiləcək.
Sığorta vəsaitləri Nazirliyin xüsusi xəzinə hesabında toplanacaq və daha sonra Fondun xüsusi bank hesabına köçürüləcək.
Sığorta vəsaitləri üzrə əməliyyatların həyata keçirilməsi, o cümlədən sığorta ehtiyatı fondunda vəsaitlərin toplanılması və onlardan istifadə edilməsi üçün Fond tərəfindən müvafiq bank hesabları açılacaq.
İstifadə olunmayan vəsait növbəti ilə keçiriləcək
Qaydalarda sığorta vəsaitinin ilin sonunda istifadə olunmamış qalığı ilə bağlı da müddəalar müəyyən edilib.
Belə ki, cari ilin sonunda istifadə olunmamış sığorta vəsaiti, sığorta ehtiyatı fondunu təmin edən vəsaitlər və həmin vəsaitlərin depozitə yerləşdirilməsindən əldə olunan gəlirlər növbəti il üçün xərclərin maliyyələşdirilməsinə yönəldiləcək.
Beləliklə, təsdiqlənən yeni qaydalar həm sığorta olunanların və sığortalıların uçotunun aparılması, həm icbari sığorta üzrə ödəniş mexanizmləri, həm də sığorta vəsaitlərinin formalaşdırılması və istifadəsi ilə bağlı prosedurları daha konkret şəkildə müəyyən edir.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
