Azərbaycanda sığorta sektoru rəqəmsallaşma, yeni texnologiyaların tətbiqi və müştərilərin gözləntilərinin dəyişməsi fonunda yeni inkişaf mərhələsinə daxil olur. Sığorta ödənişlərinin artması, könüllü məhsullara marağın yüksəlməsi və rəqəmsal xidmətlərin genişlənməsi bazarın gələcək inkişafı üçün yeni imkanlar yaradır.
Bəs qarşıdakı illərdə Azərbaycan sığorta sektorunda hansı dəyişikliklər baş verəcək? Süni intellekt və Big Data risklərin qiymətləndirilməsi, sığorta haqqının hesablanması və mümkün fırıldaqçılıq hallarının aşkarlanmasına necə təsir göstərəcək? Hansı sığorta məhsulları daha böyük inkişaf potensialına malikdir və müştərilərin tələbləri necə dəyişir?
“Sığortalı Azərbaycan” bu və digər sualları “Meqa Sığorta”nın İctimaiyyətlə Əlaqələr şöbəsinin rəhbəri Emil Ağabağırov ilə müzakirə edib.
Emil Ağabağırov: “Hazırda sığorta sektorunda ciddi problemlər yox səviyyəsindədir”
– Emil Ağabağırov, hazırda sığorta sektorunun qarşılaşdığı əsas problemləri necə qiymətləndirirsiniz? Bu problemlərin səbəbləri nələrdir?
– Hazırda sığorta sektorunda ciddi problemlər demək olar ki, yox səviyyəsindədir. Əsasən sığorta hadisələri zamanı ortaya çıxan kiçik məsələlər olur və əksər hallarda son nəticədə tərəflər arasında razılıq əldə edilir.
Son illərdə ölkəmizdə aparılan maarifləndirmə işləri nəticəsində vətəndaşların sığorta məhsulları haqqında məlumatlılığı əhəmiyyətli dərəcədə artıb. Eyni zamanda insanların sığorta şirkətlərinə etimadı da yüksəlir.
Sığorta ödənişlərinin artması da bu baxımdan mühüm göstəricidir. Ödənişlərin yüksəlməsi vətəndaşların sığortaya marağının və etibarının artdığını göstərir.
“Sığorta ödənişlərinin artması etimadı gücləndirir”
– Azərbaycanda insanların sığortaya marağını və etimadını hansı səviyyədə qiymətləndirirsiniz? Sığortanın daha geniş yayılması üçün nə dəyişməlidir?
– Qeyd etdiyim kimi, son illərdə insanlar sığorta şirkətlərinə daha çox güvənərək müraciət etməyə başlayıblar. Xüsusilə avtomobillərin icbari sığortası üzrə bunu daha aydın müşahidə etmək mümkündür.
Yol-nəqliyyat hadisələri nəticəsində zərərçəkənlərə ödənilən sığorta məbləğləri kifayət qədər yüksəkdir. Eyni zamanda yanğın, partlayış və subasma kimi hadisələr nəticəsində əmlak üzrə həyata keçirilən ödənişlər də artır.
Belə nəticələr sığortaya olan marağın daha da yüksəlməsinə stimul verir. Etimadın daha da möhkəmlənməsi üçün isə sığortanın mahiyyətinin və insanlara hansı maliyyə qorunmasını verdiyinin daha geniş izah edilməsi məqsədəuyğundur.
Fərdiləşdirilmiş sığorta məhsullarına maraq artır
– Sığorta şirkətləri müştərilərə daha fərdiləşdirilmiş məhsullar və qiymətlər təqdim etmək üçün hansı üsullardan istifadə edə bilər?
– Müştərilərin büdcəsinə uyğun olaraq müxtəlif sığorta növlərinin mini paketlər şəklində təqdim edilməsi artıq tətbiq olunan yanaşmalardan biridir.
Bununla yanaşı, mobil tətbiqlər və internet saytları üzərindən əldə edilən könüllü sığorta məhsullarına müəyyən endirimlərin tətbiqi də müştərilər üçün əlavə stimul yaradır.
Digər tərəfdən, hər hansı sığorta məhsulu əldə edən vətəndaş il ərzində sığorta hadisəsi ilə qarşılaşmadıqda sığorta şirkətləri tərəfindən müxtəlif güzəştlərin tətbiq edilməsi də mümkündür.
Süni intellekt risklərin qiymətləndirilməsini dəyişə bilər
– Süni intellekt və Big Data sığorta sektorunu necə dəyişə bilər? Xüsusilə risklərin qiymətləndirilməsi, fırıldaqçılığın aşkarlanması və sığorta haqqının hesablanmasında AI hansı rolu oynaya bilər?
– Süni intellekt bütün mövcud məlumatları təhlil etməklə müştərinin risk profilini daha dəqiq müəyyənləşdirməyə imkan verə bilər.
Məsələn, kasko sığortasında sürücünün davranışı, qəza tarixçəsi və avtomobildən istifadə xüsusiyyətləri nəzərə alınaraq daha fərdi tarif formalaşdırıla bilər.
Big Data isə müxtəlif mənbələrdən əldə edilən məlumatları bir araya gətirərək şübhəli sığorta hadisələrinin müəyyənləşdirilməsinə kömək edə bilər. Bunun nəticəsində sığorta hadisələrinin daha sürətli araşdırılması və dinamik risk qiymətləndirilməsinin həyata keçirilməsi mümkün olacaq.
Eyni zamanda 24/7 fəaliyyət göstərən süni intellekt əsaslı müştəri xidmətləri də geniş yayıla bilər. Chatbotlar sadə sualları cavablandıra, sığorta polisi haqqında məlumat verə, ödənişin statusunu yoxlaya və hadisə baş verdikdə müştəriyə mərhələli şəkildə istiqamət göstərə bilər.
“Saxtakarlıq hallarına çox az rast gəlinir”
– Sığorta fırıldaqçılığı sektora nə dərəcədə ciddi təsir edir və şirkətlər bunun qarşısını almaq üçün hansı texnologiyalardan istifadə edir?
– Hazırda saxtakarlıq hallarına çox az rast gəlinir. Bunun əsas səbəblərindən biri sektorda çalışan mütəxəssislərin kifayət qədər təcrübəli olmasıdır.
Baş vermiş və ya potensial sığorta hadisələri zamanı mütəxəssislər riskləri təhlil edir, mümkün boşluqları müəyyənləşdirir və lazımi nəzarəti həyata keçirirlər.
Ümumilikdə isə sığorta sektorunda çalışan hər bir əməkdaş potensial risklərin müəyyənləşdirilməsi və qarşısının alınmasına öz töhfəsini verməlidir.
İqlim dəyişikliyi risk modellərini dəyişir
– İqlim dəyişiklikləri, təbii fəlakətlər və yeni risklər sığorta şirkətlərinin risk modellərinə necə təsir göstərir?
– Ümumilikdə iqlim dəyişiklikləri, təbii fəlakətlər və yeni risklər sığorta şirkətlərini risk modellərini daha dinamik, proqnozlaşdırıcı və texnologiya əsaslı qurmağa məcbur edir.
Bu şəraitdə risklərin həm tezliyi, həm də şiddəti artır. Buna görə yalnız tarixi məlumatlara əsaslanmaq kifayət etmir. Risk zonaları dəyişir, nəticədə sığorta haqları, franşizalar, limitlər və təminat şərtləri də yenidən qiymətləndirilir.
Başqa sözlə, risk səviyyəsi yüksəldikcə sığorta məhsullarının şərtlərinin də buna uyğun şəkildə yenilənməsi zərurəti yaranır.
Əmlak və tibbi sığortada böyük potensial var
– Azərbaycanda hansı sığorta məhsullarının inkişafı üçün böyük potensial görürsünüz, amma hazırda kifayət qədər istifadə olunmur?
– Bir çox sığorta məhsulunun inkişafı üçün böyük potensial var. Bunların sırasında daşınar və daşınmaz əmlak sığortalarını, könüllü tibbi sığorta paketlərini və məsuliyyət sığortalarını qeyd etmək olar.
Çünki sığorta hadisələri baş verdikdə sığortalanmamış əmlakların kifayət qədər çox olduğu müşahidə edilir.
Eyni zamanda sağlamlıq hər bir insan üçün ən vacib məsələlərdən biridir. Bu baxımdan gələcəkdə könüllü tibbi sığorta məhsullarına tələbin daha da artacağını düşünürəm.
“Növbəti 5 ildə ən böyük dəyişiklik texnologiya ilə müştəri davranışının birləşməsi olacaq”
– Sizcə, növbəti 5 il ərzində sığorta sektorunda ən böyük dəyişiklik nə olacaq – texnologiya, yeni məhsullar, müştəri davranışı, yoxsa tənzimləmə?
– 2030-cu ilə qədər Azərbaycanda “Açıq sığorta modeli”nin tətbiq edilməsi nəzərdə tutulur. Eyni zamanda həmin dövrə qədər mikrosığorta bazarının yaradılması və inkişaf etdirilməsi də hədəflənir.
İlkin mərhələdə mikrosığorta bazarının inkişaf potensialının qiymətləndirilməsi, stimullaşdırıcı tədbirlərin müəyyənləşdirilməsi, tənzimləmə və lisenziyalaşdırma tələblərinin formalaşdırılması və mikrosığorta modelinin tətbiqinə başlanılması planlaşdırılır.
Hesab edirəm ki, növbəti 5 ildə sığorta sektorunda ən böyük dəyişiklik texnologiyanın müştəri davranışı və yeni məhsul modelləri ilə birləşməsi olacaq.
Müştərinin özü də dəyişəcək. İnsanlar daha sürətli, şəffaf və rəqəmsal xidmətlər tələb edəcəklər. Şirkətlər də buna uyğun olaraq standart məhsullardan daha çox müştərinin real ehtiyaclarına cavab verən, çevik və fərdiləşdirilmiş sığorta həlləri təqdim etməyə başlayacaqlar.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
