İnvestisiya və İxrac Kreditlərinin Sığortası üzrə İslam Korporasiyası (ICIEC) və Azərbaycan Dövlət Neft Şirkətinə (SOCAR) məxsus “SOCAR Green” MMC Azərbaycanda bərpa olunan enerji layihələrinin maliyyələşdirilməsi və “yaşıl investisiya” risklərinin sığortalanması imkanlarını müzakirə edib.
“Sığortalı Azərbaycan” xəbər verir ki, müzakirələr Azərbaycanda səfərdə olan ICIEC-in baş direktoru Xalid Xələfalla ilə “SOCAR Green” MMC-nin baş direktoru Elmir Musayev arasında keçirilən görüşdə aparılıb.
“Yaşıl investisiya” üçün sığorta alətləri
Tərəflər bərpa olunan enerji sahəsində əməkdaşlıq imkanları ilə yanaşı, Azərbaycanda “yaşıl investisiya”ların cəlb olunması və layihələrin maliyyələşdirilməsi zamanı risklərin azaldılması üçün sığorta alətlərinin tətbiqini nəzərdən keçiriblər.
Görüşdə ICIEC-in siyasi risklərdən, eləcə də ödəniş öhdəliklərinin yerinə yetirilməməsi risklərindən sığortalanma imkanları müzakirə olunub.
Bankların “yaşıl layihə”lərin maliyyələşdirilməsində rolu
Tətbiqi nəzərdən keçirilən sığorta mexanizmlərinin investisiyaların səfərbər edilməsinə, layihə risklərinin azaldılmasına və bankların “yaşıl layihə”ləri maliyyələşdirməsi üçün daha dayanıqlı şəraitin yaradılmasına imkan verə biləcəyi bildirilib.
ICIEC-dən vurğulanıb ki, mümkün əməkdaşlıq Azərbaycanın bərpa olunan enerjinin inkişafı üzrə prioritetləri, eləcə də SOCAR-ın ekoloji strategiyası ilə uyğunluq təşkil edir.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
