İcbari Sığorta Bürosu-nun (İSB) fəaliyyətə başlamasının 15-ci ildönümü münasibətilə Azərbaycan mediasının nümayəndələrinin iştirakı ilə Qusar rayonuna mediatur təşkil olunub.
Sığortalı Azərbaycan xəbər verir ki, tədbirdə İSB rəhbərliyi və müxtəlif media qurumlarını təmsil edən jurnalistlər iştirak ediblər. Mediatur çərçivəsində Büronun 15 illik fəaliyyəti, inkişaf yolu, əldə etdiyi nailiyyətlər və əsas fəaliyyət istiqamətləri barədə təqdimat keçirilib.
İSB-nin 15 illik fəaliyyəti təqdim olunub
Tədbirin açılışında çıxış edən İSB-nin icraçı direktoru Vüsal Məsiyev iştirakçıları salamlayaraq icbari sığorta sahəsində ictimai məlumatlılığın artırılmasında medianın rolunu vurğulayıb.
O bildirib ki, 29 noyabr 2011-ci ildə fəaliyyətə başlayan İSB ötən 15 il ərzində Azərbaycanda icbari sığorta sisteminin inkişafı və təkmilləşdirilməsi istiqamətində mühüm addımlar atıb. Həyata keçirilən təşəbbüslər və tətbiq olunan yeniliklər icbari sığorta mexanizmlərinin təkmilləşdirilməsinə, eləcə də cəmiyyətdə sığorta mədəniyyətinin formalaşmasına töhfə verib.
Vüsal Məsiyev Büronun fəaliyyətinin ictimaiyyətə çatdırılması və görülən işlərin işıqlandırılması baxımından media ilə əməkdaşlığın əhəmiyyətinə də diqqət çəkib.
Media ilə əməkdaşlığın əhəmiyyəti vurğulanıb
İSB-nin icraçı direktorunun müavini Seymur Mirzəyev çıxışında sığorta sahəsində ictimai məlumatlılığın artırılmasında medianın rolundan danışıb.
Onun sözlərinə görə, vətəndaşların icbari sığorta ilə bağlı hüquq və öhdəlikləri barədə məlumatlandırılması, onları maraqlandıran sualların cavablandırılması və sığorta mədəniyyətinin inkişafı üçün media ilə əməkdaşlıq xüsusi əhəmiyyət daşıyır.
Tədbir zamanı İSB-nin xarici tərəfdaşlarının 15 illik yubiley münasibətilə ünvanladıqları təbrikləri əks etdirən videoçarx da nümayiş etdirilib.
Gələcək fəaliyyət perspektivləri müzakirə olunub
Daha sonra İSB-nin Biznesin İnkişafı Departamentinin rəhbəri Xanım Camalova Büronun 15 illik fəaliyyətinə həsr olunmuş təqdimatla çıxış edib.
Təqdimatda qurumun əsas fəaliyyət istiqamətləri, inkişaf mərhələləri, əldə etdiyi nəticələr və gələcək fəaliyyət perspektivləri barədə məlumat verilib.
Mediaturun sonunda iştirakçılara xatirə hədiyyələri təqdim olunub.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
