“Problem könüllü sığorta növlərinin…” Kamran Babayev – Müsahibə

0
807
Kamran Babayev
Kamran Babayev

Sığortalı Azərbaycan sığorta sektorunun tanınmış şəxsləri ilə silsilə müsahibələri davam edir. Bu dəfəki qonağımız “Günay sığorta”-nın idarə heyətinin müşaviri: Kamran Babayev

– Sizcə, “Covid 19” pandemiyası hadisə sayını artırdı ya azaltdı? Ümumilikdə bu məsələnin zərər həcmlərinə təsiri necə oldu?

–  Kamran Babayev: Onu deyə bilərəm ki, sərt karantin dövründə avto qəzaların sayı azalmışdı. Evdən çıxış sms-lə idi, vətəndaşlar avtomobillərdən az istifadə edirdilər. Amma hal-hazırda hadisələrin sayında hətta deyərdim ki, çoxalma müşahidə edilir.

Bakı şəhərində baş verən hadisələrin sayı artıb. Bunun bir səbəbi şəhərdə taksilərin sayının artmasıdır. Bugün avtonəqliyyat vasitəsi sahiblərinin mülki məsuliyyətinin icbari sığortası üzrə sığorta haqları hadisə tezliyi və zərər həcmlərinə görə adekvat deyil və bu növü sığorta şirkətləri üçün cəlb edici etmir.

Sərt karantin vaxtı tibbi sığorta üzrə də zərər ödənişlərində azalma müşahidə edilirdi. Səbəb kimi onu göstərə bilərik ki, vətəndaşlar xəstəxanalara daha az gedirdilər. Digər sığorta növləri üzrə hadisə sayında ciddi bir artım və ya azalma müşahidə olunmur.

– Sığorta ilə bağlı indeks yanaşmaları Azərbaycanda tətbiq olunurmu? Olunmursa sizcə, bu kimi yanaşmaların tətbiqi ölkə sığorta bazarına nə kimi töhvələr verə bilər?

Kamran Babayev: İndeks sığorta Azərbaycanda inkişaf etməyib. Belə bir sığorta məhsulunu Azərbaycanda bir neçə il bundan əvvəl dünya nəhənglərindən olan Swiss Re şirkəti təqdim etmişdi. Məhsul kənd təsərrüfatı bitkilərinin sığortası ilə əlaqədar idi.

Dünayada indeks sığorta hava şəraiti ilə əlaqədar olaraq bir çox sahələrdə tətbiq edilir: məsələn turizm sahəsində, inşaat sahəsində, energetika sahəsində, logistika və s. İndeks sığorta çox maraqlı sığortadır, klassik bizim tanıdığımız indemnity yanaşmasından fərqli bir yanaşmadır. Sığorta dedikdə bizim başa düşdüyümüz odur ki, hadisə baş verməlidir və vətəndaşa zərər dəyməlidir ki, sığorta şirkəti ödəniş etsin. İndeks sığortada hadisənin baş verməsi və zərərin dəyməsi şərt deyil.

Müqavilə ilə razılaşdırılmış hadisə yox, şərt baş verərsə, sığorta şirkəti razılaşdırılmış ödənişi həyata keçirir. Məs., kənd təsərrüfatı sığortasında müqavilə ilə şərtləşdirilib ki, aprel ayında havanın temperaturu mənfi 5 olarsa, sığorta şirkəti ödəniş edəcək. Bu zaman sığortalıya zərərin dəyməsi şərt deyil və yoxlanılmır. Dünyada da bu sığorta nisbətən yeni sığortadır və düşünürəm ki, gələcəkdə ciddi şəkildə inkişaf edəcək. İndeks sığorta sığortaçılığa fərqli bir baxışdır.

– Niyə Azərbaycanda bahalı Avtomobillərin sığortasını əldə etmək hələ də müşkül məsələdir? Bunun həll yolu nədir?

– Kamran Babayev: Məncə məsələ yalnız bahalı avtomobillərdə deyil. Ümumiyyətlə KASKO, daha dəqiq desək problem könüllü sığorta növlərinin inkişaf etməməsindədir. Bahalı avtomobilin sığorta haqqısı da yüksək olur. Yüksək sığorta haqqını ödəmək üçün ilk olaraq vətəndaşlar sığorta şirkətlərinə güvənməlidirlər. Sığorta şirkətləri vəd satır – əgər hadisə olarsa, ödəniş edəcək. Əfsuslar olsun ki, bu vədə hələ də vətəndaşların əksər hissəsi inanmır. Sığorta şirkətləri göstərdikləri xidmətin keyfiyyətini artırmalıdırlar, ödənişləri operativ ödəməlidirlər, zərər məbləğini ədalətli qiymətləndirməlidir ki, vətəndaşlar sığortaya güvənsinlər, etibar etsinlər. Güvən olmazsa, sığorta bazarı inkişaf etməz.

– “Covid 19” eyni zamanda kiber risklərin baş vermə ehtimalını artırıb. Sizcə, ölkəmizdə kiber risklərin durumu nə yerdədir və sığortaçı olaraq biznes sahiblərinə məsləhətləriniz nələr olardı?

– Kamran Babayev: Bir neçə il bundan əvvəl kiber sığorta haqqında danışmışdım və nə qədər önəmli olduğunu bildirmişdim. Son zamanlar şirkətlərə qarşı edilən kiber hücumlar çoxalıb və buna qarşı sığortalanmaq düzgün olardı. Kiber sığorta geniş sığorta növüdür, lakin ölkəmizdə bu sığorta növü tətbiq edilmir. Biznes sahiblərinə məsləhətim o olardı ki, ilk olaraq müəssisədə İT audit keçirsinlər, boşluqları görsünlər və aradan qaldırsınlar. Kiber sığorta ilə də maraqlansalar yaxşı olar.

– “Günay” sığortanın digər sığortaçılardan fərqləndirən hansı xüsusiyyətləri var?

Kamran Babayev: Hər sığorta şirkətinin özünə məxsus özəlliyi var. Hamımız bir gəmidəyik və sığorta bazarının inkişaf etməsi üçün tövhələrimizi veririk, bu istiqamətdə çalışırıq. Biz başa düşürük ki, bazarın böyüməsi həm də müştəri sayının artması deməkdir. Bazar böyüyərsə, inkişaf edərsə, biz də böyüyüb inkişaf edərik.

– Sonda gənc sığortaçılara məsləhətiniz?

Kamran Babayev: Sığorta sahəsi əslində həm maraqlı, həm də çox geniş və çətin sahədir. Bir çox insanlar sığorta fəaliyyətinə başlayanda, əsasən öz rəhbərlərindən və ya digər əməkdaşlardan praktiki biliklər alır və bununla da kifayətlənir. Belə olan halda şirkətə fərqlilik, yeni nəfəs gətirmək alınmayacaq.

Gənc sığortaçılara məsləhətim odur ki, öz üzərilərində daim çalışsınlar, beynəlxalq bazarları öyrənsinlər və təhlil etsinlər, fərqli təlimlərdə iştirak etsinlər, sığortaçılığın yalnız praktiki deyil, nəzəriyyəsini bilsinlər. Bizdən öndə olan və bizim sığorta bazarının keçdiyi yolu çoxdan keçən ölkələrin təcrübəsi öyrənilməlidir və bizim bazara uyğunlaşdırılıb, lazım olanlar tətbiq edilməlidir.

Mən həmişə demişəm ki, bizim sığorta bazarının gözəl imkanları var, biz çox şanslıyıq. Bizim indi keçdiyimiz yolları keçən ölkələr var. Onların keçdiyi yolları öyrənmək lazımdır və onların etdiyi səhvləri təkrarlamamaq lazımdır. Öyrənin və öyrədin. Aldığınız bilikləri digərləri ilə paylaşmasanız, iş yarımçıq görülmüş olur. Öyrənmək yetərli deyil. Öyrəndiklərini mütləq digərlərinə öyrətməlisən. Bu halda uğur səninlə olacaq.

Kamran Babayev – Sığortalı Azərbaycan – 07.09.2021

Sığortalı Azərbaycan – https://sigortaliazerbaycan.com/ – Sigorta Medya Nəşridir – bütün hüquqlar qorunur

Sigorta Medya Türkiye – www.sigortamedya.com.tr

– Sığorta növləri və ümumi sığorta fəaliyyətləri haqqında ətraflı məlumat almaq üçün veb saytımıza daxil ola bilərsiniz. Hər gün daha inkişaf etmiş cəmiyyət olmaq məqsədi ilə addımlar atırıq. Sığorta xidmətlərinin nə qədər vacib olduğunu izah etmək, üçün ən son məlumatları və xəbərləri daxil edirik. Faydalanmaq istədiyiniz sığorta növləri haqqında ətraflı məlumat əldə etmək üçün saytımıza nəzər yetirə bilərsiniz. Saytımız vasitəsi ilə eyni zamanda həm fərdi həm korporativ sığorta növləri ilə tanış ola və bütün suallarınıza dərhal cavab ala bilərsiniz. Bizim saytımızın köməyi ilə şəxsi pensiya və həyat sığortası ilə bağlı maraqlandığınız bütün suallara cavab tapa bilərsiniz

BIR CAVAB BURAXIN

şərhinizi daxil edin!
Buraya adınızı daxil edin