Agentlik, Təbib və müharibənin təsirinə məruz qalmış rayonların mərkəzi xəstəxanalarının əməkdaşları üçün ANAMA tərəfindən təlim keçirilib.
Sığortalı Azərbaycan xəbər verir ki, Azərbaycan Respublikasının Minatəmizləmə Agentliyi (ANAMA) tərəfindən Göygöl rayonunda İcbari Tibbi Sığorta üzrə Dövlət Agentliyi (Agentlik), Tibbi Ərazi Bölmələrini İdarəetmə Birliyi (TƏBİB) və Dağlıq Qarabağ, habelə ona yaxın bölgələrdə yerləşən rayon mərkəzi xəstəxanalarının əməkdaşları üçün ümumi maarifləndirmə təlimi keçirilib.
Əməyin mühafizəsi və mülki müdafiə üzrə vəzifələrdə çalışan məsul işçilər üçün təşkil edilən təlim mina və partlayıcı sursatlar haqqında mövzuları əhatə edib
Agentlik, TƏBİB, həmçinin Xocalı, Laçın, Kəlbəcər, Ağdam, Füzuli, Bərdə, Beyləqan və Yevlax rayon mərkəzi xəstəxanalarından ümumilikdə 15 əməkdaşın cəlb olunduğu treninq ANAMA-ya məxsus Göygöl Regional Təlim Mərkəzində təşkil olunub.
Təlimin keçirilməsində məqsəd Azərbaycan Respublikasının işğaldan azad edilmiş ərazilərinə, eyni zamanda müharibə və hərbi əməliyyatların təsirinə məruz qalmış digər bölgələrə xidməti zərurətlə əlaqədar səfər edəcək şəxslərin mina və partlayıcı sursatların törədə biləcəyi təhlükələrə dair maarifləndirilməsini təmin etməkdir.
Qeyd olunmalıdır ki, bundan başqa təlimin əsas istiqamətlərindən biri də hazırkı iştirakçıları çalışdıqları qurumun qeyd olunan ərazilərə ezam olunacaq əməkdaşlarına eyni məzmunlu təlimi keçə bilmələri üçün hazırlamaqdır.
Tədbirdə ANAMA-nın məsul əməkdaşı tərəfindən iştirakçılara mina və partlayıcı sursatlar, partlamamış sursatlar, minalanmış ərazi və təhlükəsizlik nişanları barəsində geniş məlumat verilib, hər bir mövzuya uyğun olaraq təqdimatlar nümayiş olunub
Təlimdə minanın piyada əleyhinə və tank əleyhinə kimi növləri, formaları, partlayıcı sursatların ümumi əlamətləri, təhlükəsizlik nişanlarının mənası və əhəmiyyəti, minalanmış ərazinin relyefinin xüsusiyyətləri haqqında ətraflı informasiya çatdırılıb.
Xüsusi olaraq vurğulanıb ki, ezam olunmuş şəxslər təyin edilmiş yerlərdən, yollardan, cığırlardan kənara çıxmamalı, naməlum və şübhəli əşyalara toxunmamalı və dağıdılmış yaşayış və digər tikililərin olduğu əraziyə daxil olmamalıdırlar.
Həmçinin təlimdə atılıb qalmış sursat və texnikanın, habelə dağıdılmış yaşayış və digər tikililərin olduğu əraziyə yaxınlaşmağın həyat üçün təhlükəli olduğu diqqətə çatdırılıb.
Eyni zamanda təlimatçılar tərəfindən iştirakçılara əyani surətdə Birinci və İkinci Qarabağ müharibəsi zamanı Azərbaycan və Ermənistan Silahlı Qüvvələri tərəfindən istifadə olunmuş və ANAMA tərəfindən zərərsizləşdirilmiş mina və partlayıcı sursatların nümunələri göstərilib, onların kəsilmiş daxili hissələri və xarici görünüşləri haqqında vacib məqamlar qeyd olunub.
Bundan başqa, treninqin son hissəsində Azərbaycan Respublikasının Fövqəladə Hallar Nazirliyi nin məsul əməkdaşları tərəfindən iştirakçılara mina və sursatların partlayışı nəticəsində yaranan yanğın hadisəsi haqqında məlumat verilib və yanğın təhlükəsizliyinə dair təlimat nəzərə çatdırılıb.
Qeyd edək ki, tədbirin sonunda təlim iştirakçılarına ANAMA tərəfindən hazırlanan işğaldan azad edilmiş ərazilərdə mina və partlayıcı sursatların təhlükəsinə dair fərdi təlimat kitabçası təqdim olunub.
Sığortalı Azərbaycan – https://sigortaliazerbaycan.com/ – Sigorta Medya Nəşridir – bütün hüquqlar qorunur
Sigorta Medya Türkiye – www.sigortamedya.com.tr
– Sığorta növləri və ümumi sığorta fəaliyyətləri haqqında ətraflı məlumat almaq üçün veb saytımıza daxil ola bilərsiniz. Hər gün daha inkişaf etmiş cəmiyyət olmaq məqsədi ilə addımlar atırıq. Sığorta xidmətlərinin nə qədər vacib olduğunu izah etmək, üçün ən son məlumatları və xəbərləri daxil edirik. Faydalanmaq istədiyiniz sığorta növləri haqqında ətraflı məlumat əldə etmək üçün saytımıza nəzər yetirə bilərsiniz. Saytımız vasitəsi ilə eyni zamanda həm fərdi həm korporativ sığorta növləri ilə tanış ola və bütün suallarınıza dərhal cavab ala bilərsiniz. Bizim saytımızın köməyi ilə şəxsi pensiya və həyat sığortası ilə bağlı maraqlandığınız bütün suallara cavab tapa bilərsiniz – İqtisadi gündəm.
