Azərbaycan Sığortaçılar Assosiasiyası (ASA) ilə Avstraliyada qeydiyyatdan keçmiş beynəlxalq qeyri-kommersiya peşəkar assosiasiyası “Global Finance Association QRAFT” (GFA QRAFT) arasında institusional üzvlük və əməkdaşlıq haqqında saziş imzalanıb.
Sığortalı Azərbaycan xəbər verir ki, sazişi ASA-nın İcraçı direktoru Abas Miskərli və GFA QRAFT-ın Prezidenti Marina Şuklinova imzalayıblar.
ASA GFA QRAFT-da institusional üzv olacaq
Sazişə əsasən, ASA “Association Partner” kateqoriyası üzrə GFA QRAFT-da institusional üzv statusu əldə edib.
Əməkdaşlıq çərçivəsində sığorta və maliyyə bazarlarının inkişafı, beynəlxalq bilik və təcrübə mübadiləsi, təhsil və tədqiqat istiqamətləri üzrə birgə fəaliyyət nəzərdə tutulur.
Aktuar modelləşdirmə və süni intellekt üzrə əməkdaşlıq
Tərəflərin əməkdaşlıq gündəliyinə aktuar modelləşdirmə, risklərin idarə edilməsi, süni intellekt və rəqəmsal transformasiya kimi sahələr də daxildir.
Saziş çərçivəsində birgə peşəkar tədbirlərin və təhsil proqramlarının təşkili, həmçinin tədqiqat və analitik layihələrin həyata keçirilməsi planlaşdırılır.
Azərbaycan sığorta bazarının beynəlxalq təmsilçiliyi genişlənəcək
Əməkdaşlığın əsas istiqamətlərindən biri Azərbaycan sığorta bazarının beynəlxalq platformalarda təmsilçiliyinin genişləndirilməsidir.
Saziş ASA-ya GFA QRAFT-ın Beynəlxalq Şurasında təmsil olunmaq üçün rəsmi nümayəndə namizəd göstərmək hüququ da verir. Bundan əlavə, Assosiasiya Azərbaycan sığorta bazarı üçün aktual olan beynəlxalq layihə və təşəbbüslər irəli sürə biləcək.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
