Sığortalı Azərbaycan sığorta sektoru üzrə tanınmış ekspert Nicat Əlibəyli ilə sığorta mədəniyyəti, vətəndaşların ən çox yol verdiyi səhvlər, avtomobil sığortası ilə bağlı yanlış təsəvvürlər və sektorda tətbiq olunan yeni texnologiyalar barədə həmsöhbət olub.
Ekspert müsahibəsində sığorta müqavilələrinin diqqətlə oxunmasının vacibliyindən, sığorta şirkətlərinin hansı hallarda ödənişdən imtina edə biləcəyindən, həmçinin ailələrin ilk növbədə hansı sığorta növlərinə üstünlük verməli olduqlarından danışıb.
Azərbaycanda insanlar ən çox hansı sığorta növlərindən istifadə edirlər və hansılara ehtiyac olduğu halda diqqət yetirmirlər?
Nicat Əlibəyli: Azərbaycanda ən geniş istifadə olunan sığorta növləri icbari avtomobil sığortası və icbari tibbi sığortadır. Bununla yanaşı, vətəndaşlar əmlak, həyat, sağlamlıq və səyahət sığortalarına kifayət qədər diqqət yetirmirlər. Halbuki məhz bu sığorta növləri gözlənilməz hadisələr zamanı ailə büdcəsinin qorunmasında mühüm rol oynayır.
Sığorta alarkən insanların ən çox etdiyi səhvlər hansılardır?
Nicat Əlibəyli: Ən çox rast gəlinən səhv sığortanı yalnız qiymətə görə seçməkdir. Bir çox hallarda insanlar müqavilə şərtlərini oxumur, təminatın hansı riskləri əhatə etdiyini araşdırmır və nəticədə gözləntiləri ilə reallıq arasında fərq yaranır. Bundan əlavə, məlumatların düzgün təqdim edilməməsi də sonradan problemlərə səbəb ola bilir.
Sığorta müqaviləsini imzalamazdan əvvəl vətəndaş hansı məqamlara mütləq diqqət etməlidir?
Nicat Əlibəyli: Müqavilə imzalanmazdan əvvəl sığorta təminatının həcmi, istisna hallar, sığorta məbləği, ödəniş mexanizmi və hadisə baş verdiyi zaman müraciət qaydaları diqqətlə öyrənilməlidir. Hər bir vətəndaş müqaviləni tam oxumadan və şərtlərlə tanış olmadan imza atmamalıdır.
Hansı hallarda sığorta şirkəti ödənişdən imtina edə bilər və bunun əsas səbəbləri nələrdir?
Nicat Əlibəyli: Əgər sığorta hadisəsi müqavilə şərtlərinə uyğun deyilsə, müştəri tərəfindən yanlış məlumat təqdim olunubsa, hadisə barədə vaxtında məlumat verilməyibsə və ya baş vermiş hal müqavilədə göstərilən istisnalar sırasındadırsa, sığorta şirkəti ödənişdən imtina edə bilər. Buna görə də müqavilə şərtlərini əvvəlcədən bilmək vacibdir.
Avtomobil sığortası ilə bağlı ən çox rast gəlinən yanlış təsəvvürlər hansılardır?
Nicat Əlibəyli: Bir çox sürücü hesab edir ki, icbari avtomobil sığortası istənilən halda onun öz avtomobilinə dəyən zərəri də qarşılayır. Əslində isə icbari sığortanın əsas məqsədi üçüncü şəxslərə vurulan zərərin ödənilməsidir. Sürücünün öz avtomobilinə dəyən zərərin ödənilməsi yalnız qanunvericilikdə nəzərdə tutulan xüsusi hallarda, o cümlədən Zərərin Birbaşa Tənzimlənməsi mexanizmi çərçivəsində mümkündür.
Son illərdə sığorta sektorunda hansı yeniliklər və rəqəmsal həllər tətbiq olunmağa başlayıb? Süni intellekt bu sahəyə necə təsir edir?
Nicat Əlibəyli: Son illərdə sığorta sektorunda rəqəmsallaşma sürətlənib. Onlayn satış kanalları, elektron müqavilələr, rəqəmsal müraciət sistemləri və avtomatlaşdırılmış xidmətlər artıq geniş tətbiq olunur. Süni intellekt isə risklərin daha dəqiq qiymətləndirilməsi, fırıldaqçılığın aşkarlanması, hesabatlılığın artırılması və müştəri xidmətlərinin operativləşdirilməsi istiqamətində mühüm imkanlar yaradır.
Əgər bir ailə ilk dəfə sığorta almaq istəyirsə, siz onlara hansı sığorta növlərindən başlamağı tövsiyə edərdiniz?
Nicat Əlibəyli: İlk dəfə sığorta almağı düşünən ailələrə ilk növbədə həyat, sağlamlıq və əmlak sığortalarını nəzərdən keçirməyi tövsiyə edərdim. Əgər ailənin avtomobili varsa, avtomobil sığortası da vacib seçimlər sırasındadır. Bu sığorta növləri gözlənilməz maliyyə risklərinə qarşı daha güclü qorunma təmin edir və ailənin maliyyə sabitliyinin qorunmasına kömək edir.
Müəllif Hüquqları:
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri (həyat sığortası, könüllü pensiya sığortası) haqqında ən son xəbərləri izləyə bilərsiniz. Regionun sığorta gündəmi üçün Sigorta Medya Türkiye səhifəsini də ziyarət edə bilərsiniz.
