Azərbaycanda sığorta sektorunda peşəkar kadr hazırlığı və ixtisasartırma proqramlarının inkişafı bazarın əsas prioritetlərindən biri hesab olunur. “Sığortalı Azərbaycan” bu mövzu ilə bağlı Azərbaycan Sığortaçılar Assosiasiyası nın (ASA) nəzdində fəaliyyət göstərən ASA Tədris Mərkəzi nin direktoru Pərviz Quliyev ilə həmsöhbət olub. Müsahibədə ölkədə sığorta tədrisinin hazırkı vəziyyəti, bazarın əsas təlim ehtiyacları, gələcək sertifikatlaşdırma proqramları və beynəlxalq əməkdaşlıqlar müzakirə edilib.
– Azərbaycan sığorta sektorunda lokal çərçivədə sığorta tədrisi ilə bağlı hazırda nə kimi addımlar atılır?
Pərviz Quliyev: Hazırda Azərbaycan Sığortaçılar Assosiasiyasının nəzdində fəaliyyət göstərən ASA Tədris Mərkəzi sığorta sahəsində ixtisaslaşmış əsas tədris platformalarından biridir. Mərkəzdə yalnız sığorta mövzuları deyil, eyni zamanda sığorta şirkətlərinin ehtiyaclarına uyğun olaraq satış, müştəri məmnuniyyəti, menecment, risklərin idarə olunması, daxili audit, əmək qanunvericiliyi, prudensial hesabatlıq, insan resurslarının idarə olunması, layihələrin idarə olunması, data analitikası, biznes analitikası və digər istiqamətlər üzrə təlimlər keçirilir.
Sığorta istiqamətində təqdim olunan proqramlara “Peşəkar Sığortaçı Sertifikatı”, “Sığortanın əsasları”, “Gənc sığorta mütəxəssisi” və müxtəlif sığorta məhsulları üzrə ixtisaslaşdırılmış təlimlər daxildir. “Gənc sığorta mütəxəssisi” proqramı Azərbaycan Respublikası Elm və Təhsil Nazirliyinin sifarişi ilə hazırlanmış dərslik əsasında tədris olunur.
Bununla yanaşı, sığorta şirkətlərinin daxili akademiyalarında yeni əməkdaşlar və sığorta agentləri üçün xüsusi hazırlıq proqramları təşkil edilir. Eyni zamanda müxtəlif təlim şirkətləri və orta ixtisas təhsil müəssisələri də sığorta sahəsində kadr hazırlığı istiqamətində fəaliyyət göstərirlər.
– Azərbaycan sığorta bazarının bu gün əsas təlim ehtiyacları nələrdən ibarətdir?
Pərviz Quliyev: Hazırda bazarda daha çox beynəlxalq standartlara uyğun bilik və bacarıqlar tələb olunur. Risklərin idarə olunması, nəzarət sistemlərinin qurulması, IFRS-17, Solvency II kimi mövzular əsas təlim istiqamətləridir.
Eyni zamanda aktuar mütəxəssislərin hazırlanmasına ciddi ehtiyac var. Anderaytinq, sığorta dələduzluğu ilə mübarizə, müxtəlif məsuliyyət sığortaları, könüllü avtomobil sığortası, təkrarsığorta, layihələrin idarə olunması və yumşaq bacarıqlar üzrə təlimlər də bazarda ən çox tələb olunan istiqamətlər sırasındadır.
– Növbəti fəaliyyət dövründə hansı layihələrin həyata keçirilməsi planlaşdırılır?
Pərviz Quliyev: Əsas prioritetlərimizdən biri Aktuar İnkişaf Proqramının yaradılması və yerli ekspertlərin iştirakı ilə həyata keçirilməsidir. Hazırda bu istiqamətdə hazırlıq işləri davam edir.
Bununla yanaşı, sığorta şirkətlərində çalışan mütəxəssislərin sertifikatlaşdırılması təlimlərinin yaradılması əsas hədəflərimizdəndir. Risklərin idarə olunması üzrə mütəxəssislər, daxili auditorlar, anderayterlər, təkrarsığorta mütəxəssisləri və digər peşə sahibləri üçün sertifikatlaşdırma proqramlarının, attestasiya mexanizmlərinin və imtahan sisteminin hazırlanması planlaşdırılır.
– Azərbaycanın beynəlxalq sığorta tədrisi sahəsində əməkdaşlıqları hansı səviyyədədir?
Pərviz Quliyev: Azərbaycan sığorta bazarı inkişaf etməkdə olan bazar olduğuna görə beynəlxalq təcrübədən faydalanmağa xüsusi önəm verir.
Uzun illərdir CII İnstitutu ilə müxtəlif əməkdaşlıqlar mövcuddur. Hazırda bəzi Azərbaycan sığorta şirkətləri institutla peşəkar tərəfdaşlıq səviyyəsində əməkdaşlıq edir. Gələcəkdə CII-nin Azərbaycanda rəsmi nümayəndəliyinin və imtahan mərkəzinin yaradılması ilə bağlı planlar da mövcuddur.
Bundan əlavə, Türkiyə Sığorta İnstitutu Vəqfi (TSEV) ilə uğurlu əməkdaşlıq həyata keçirilir. Birgə təşkil olunan proqramlar çərçivəsində Aktuar İnkişaf Proqramı, menecment, Solvency II və IFRS-17 üzrə təlimlər keçirilib və bu əməkdaşlığın gələcəkdə də davam etdirilməsi nəzərdə tutulur.
Həmçinin yerli sığorta şirkətlərinin beynəlxalq təkrarsığorta şirkətləri ilə əməkdaşlığı çərçivəsində həyat və qeyri-həyat sığortası, anderaytinq, təkrarsığorta və risklərin idarə olunması kimi sahələrdə mütəxəssislərin beynəlxalq təlimlərdə iştirakı təmin edilir.
Gələcəkdə bu əməkdaşlıqların daha da genişləndirilməsi, beynəlxalq tərəfdaşların və xarici ekspertlərin sayının artırılması əsas məqsədlərdən biridir.
Müəllif Hüquqları: Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
