Əmanətlərin Sığortalanması Fondu (ƏSF) bəzi media subyektlərində əmanətlərin sığortalanması mexanizmi və qorunan əmanətlər üzrə faiz hədləri ilə bağlı yanlış və ya dəqiq olmayan məlumatların yayıldığını bildirib.
ƏSF-nin məlumatına görə, bu cür məlumatların rəsmi mövqeyə istinad edilmədən yayılması əhali arasında çaşqınlıq yarada və bank sisteminə etimadın azalmasına səbəb ola bilər.
Qorunan əmanətlər üzrə faiz hədləri açıqlanıb
ƏSF xatırladıb ki, Azərbaycanda əmanətlərin sığortalanması mexanizmi “Əmanətlərin sığortalanması haqqında” Qanun ilə tənzimlənir.
Hazırda qorunan əmanətlər üzrə milli valyutada illik faiz dərəcəsinin yuxarı həddi 12%, xarici valyutada isə 2,5% təşkil edir.
ƏSF-nin bildirdiyinə görə, fiziki şəxslərdən əmanət cəlb etmək üçün bank lisenziyasına malik banklar qanunla müəyyən edilmiş qaydada Fondun məcburi iştirakçılarıdır. Sistemin maliyyə bazası əsasən iştirakçı bankların ödədiyi sığorta haqları hesabına formalaşır.
Kompensasiya hansı həddə ödənilir?
Əmanətlərin sığortalanması sistemi sığorta hadisəsi baş verdikdə bankdakı bütün əmanətlərin deyil, yalnız qanunla müəyyən edilmiş çərçivədə qorunan əmanətlərin kompensasiya olunmasını nəzərdə tutur.
Hazırkı qaydalara əsasən:
- Fiziki şəxslərin banklardakı cari və əmanət hesablarında olan vəsaitlər 100% həcmində, lakin 100 000 manatdan çox olmamaq şərtilə kompensasiya edilir;
- Fiziki şəxslərin sahibkarlıq fəaliyyəti ilə bağlı hesablarındakı vəsaitlər üzrə kompensasiya 20 000 manatadək ödənilir;
- Notariusların depozit hesablarında fiziki şəxslərə məxsus vəsaitlər tam həcmdə kompensasiya olunur.
Fond qeyd edib ki, fiziki şəxslərin sahibkarlıq fəaliyyəti ilə bağlı hesablarının 20 000 manatadək, notariusların depozit hesablarında fiziki şəxslərə məxsus vəsaitlərin isə tam həcmdə qorunması 2020-ci ilin dekabrında qanunvericiliyə edilmiş dəyişikliklərlə sistemə əlavə edilib.
ƏSF indiyədək 1,7 milyard manatdan çox kompensasiya ödəyib
ƏSF-nin məlumatına görə, 2020-ci ilədək sığorta hadisəsi baş vermiş banklar üzrə 28 820 qorunan əmanətçiyə 831 milyon 764 min 855,06 manat kompensasiya ödənilib.
2020-ci ildən etibarən sığorta hadisəsi baş vermiş 6 bank üzrə isə 35 070 qorunan əmanətçiyə 898 milyon 129 min 935,33 manat məbləğində kompensasiya həyata keçirilib.
Beləliklə, qeyd olunan iki dövr üzrə ödənilən kompensasiyaların ümumi məbləği 1,73 milyard manatı ötür.
Kompensasiya ödənilməsi digər tələbləri aradan qaldırmır
ƏSF vurğulayıb ki, kompensasiyanın ödənilməsi əmanətçinin banka qarşı bütün tələblərinin avtomatik başa çatması demək deyil.
Əmanətin məbləği ödənilmiş kompensasiyadan çox olduqda, qalan məbləğ üzrə əmanətçinin banka qarşı tələb hüququ saxlanılır. Bu tələblərin qanunvericilikdə müəyyən edilmiş qaydada bankın aktivləri hesabına ödənilməsi nəzərdə tutulur.
Fond həmçinin bildirib ki, onun fəaliyyəti yalnız sığorta hadisəsi baş verdikdə qorunan əmanətçilərə kompensasiya ödənilməsi ilə məhdudlaşmır. ƏSF-nin funksiyalarına sığorta haqlarının toplanması, ehtiyatların formalaşdırılması, risklərin idarə olunması, Fondun vəsaitlərinin qorunması və kompensasiya ödənildikdən sonra tələb hüququnun həyata keçirilməsi də daxildir.
ƏSF mediaya rəsmi məlumatlara istinad etməyi tövsiyə edib
Fond müxtəlif mütəxəssislərin və iqtisadçı ekspertlərin çıxışlarında səsləndirilən yanlış və ya dəqiq olmayan məlumatların media vasitəsilə yayılmasının çaşqınlıq yarada biləcəyini bildirib.
ƏSF bu tip məlumatların ictimaiyyətə təqdim edilməsindən əvvəl Fondun rəsmi mövqeyinin alınmasını tövsiyə edib.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
