Sığortalı Azərbaycan xəbər verir ki, Türk dünyasında sığorta sektorunun inkişafı istiqamətində yeni mərhələ başlayır. Üzv ölkələr arasında əməkdaşlığın gücləndirilməsi və ortaq mexanizmlərin yaradılması mühüm imkanlar açır.
Bu əməkdaşlığın institusional platforması olan Türk Dünyası Sığorta Birliyi (TDSB) regional bazarların inteqrasiyası baxımından böyük əhəmiyyət daşıyır.
Biz də bu istiqamətdə həyata keçirilən təşəbbüsləri öyrənmək üçün xüsusi müsahibə təşkil etdik. Azərbaycan Sığortaçılar Assosiasiyası-nın (ASA) İcraçı direktorunun müşaviri və TDSB-nin Baş katibi Məmməd Ağayev müsahibə zamanı suallarımızı cavablandırdı.
– Məmməd bəy, ilk olaraq Türk Dünyası Sığorta Birliyinin yaranma zərurəti və başlıca məqsədləri haqqında nə deyə bilərsiniz?
– Türk Dünyası Sığorta Birliyi öz-özlüyündə böyük bir zərurət idi. Çünki 2009-cu ildə Türk Dövlətləri Təşkilatı (TDT) yaradılmışdı. Lakin sahələr üzrə fərqli birliklərin təşkilatlanması gecikirdi. Biz də sığorta sahəsində türk dövlətlərinin ortaq platformasını yaratmaq qərarına gəldik.
Bu addım Azərbaycan Sığortaçılar Assosiasiyası və Türkiyə Sığorta Birliyinin birgə təşəbbüsü ilə atıldı. O dövrdə Türkiyə Sığorta Birliyinin sədri olan Atilla Benlinin bu prossesdə böyük xidmətləri oldu.
Nəticədə 2022-ci il mayın 24-də İstanbulda keçirilən “Beynəlxalq Sığorta Zirvəsi”ndə təsis aktı imzalandı. Azərbaycan, Qazaxıstan, Qırğızıstan, Türkiyə və Özbəkistanın iştirakı ilə Birlik rəsmən fəaliyyətə başladı.
Əsas hədəflərimiz “Yol xəritəsi”nin hazırlanması və TDT ilə sıx əməkdaşlığın qurulması idi. Həmçinin təcrübə mübadiləsinin təşkili və vahid təkrarsığorta hovuzunun yaradılması da prioritetlərimiz arasındadır.
– Təsis prosesindən sonrakı inkişaf mərhələsində hansı praktiki addımlar atıldı?
– İlk olaraq strateji addımlarımızı müəyyən edən “Yol xəritəsi”ni hazırladıq. Bu sənəd üzv ölkələrin nəzarətedici qurumları tərəfindən yüksək qiymətləndirildi və TDT-yə təqdim olundu.
Daha sonra 2025-ci il sentyabrın 14-də Şuşa şəhərində 1-ci Assambleyamızı keçirdik. Həmin tədbirdə ASA Müşahidə Şurasının sədri Ülviyyə Cabbarova Birliyin ilk sədri seçildi.
Şuşada Birlik üçün çox önəmli Proklamasiya aktı imzalandı. Bu sənədlə Macarıstan, Türkmənistan və Şimali Kipr Türk Respublikasının sığorta assosiasiyaları Birləşməyə müşahidəçi üzv kimi qoşuldular.
– Yaxın günlərdə Qaziantepdə 2-ci Assambleya baş tutdu. Bu tədbirdə hansı mühüm qərarlar qəbul olundu?
– Türkiyənin Qaziantep şəhərində keçirilən 2-ci Assambleya çox zəngin proqramla təşkil olunmuşdu. Tədbirdə həm requlyatorların, həm də assosiasiya rəhbərlərinin iştirakı ilə iki vacib panel müzakirəsi keçirildi.
Həmçinin Türkiyə Sığorta Birliyinin dəstəyi ilə hazırlanan rəsmi veb-saytımızın təqdimatı oldu. Qapalı iclasda isə yeni rəhbərlik heyəti seçildi.
Səsvermə nəticəsində Atilla Benli yeni sədr, mən isə Baş katib vəzifəsinə yekdilliklə seçildik. Eyni zamanda 3-cü Assambleyanın Özbəkistanda keçirilməsi qərara alındı.
– Növbəti mərhələdə Türk Dünyası Sığorta Birliyinin əsas fəaliyyət istiqamətləri nələrdən ibarət olacaq?
– Növbəti dövrdə ölkələrimiz arasında təcrübə mübadiləsini daha da intensivləşdirəcəyik. Həmçinin ortaq sığorta məhsullarının yaradılması üzərində işləyəcəyik.
Ən başlıca hədəfimiz isə ortaq təkrarsığorta hovuzunun formalaşdırılmasıdır. Bu mexanizm risklərin düzgün bölüşdürülməsinə və sığorta təminatının güclənməsinə xidmət edəcək.
Bizim əsas çağırışımız dəyişməzdir: Güclü sığorta güclü iqtisadiyyat, güclü iqtisadiyyat isə güclü Türk dünyası deməkdir!
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında məlumatlar təqdim olunur.
