Azərbaycan Mərkəzi Bankı (AMB) və Azərbaycan Sığortaçılar Assosiasiyasının (ASA) rəhbərliklərindən ibarət nümayəndə heyəti Qazaxıstanın Almatı şəhərində keçirilən “Beynəlxalq Sığorta Forumu – 2026” tədbirində iştirak edib.
Forumda 30-a yaxın ölkədən ümumilikdə 200-ə yaxın iştirakçı – sığorta nəzarətedici orqanlarının, sığorta assosiasiyalarının və peşəkar sığorta bazarının nümayəndələri bir araya gəlib.
Azərbaycan nümayəndələri panel müzakirələrində çıxış ediblər
Azərbaycan nümayəndə heyəti Forum çərçivəsində keçirilən panel müzakirələrində də çıxış edib.
Azərbaycan Mərkəzi Bankının Baş direktoru Vüsal Qurbanov “Strategiya 2030: Qanunvericiliyin inkişaf və transformasiya istiqamətləri” panelində, Azərbaycan Sığortaçılar Assosiasiyasının İcraçı direktoru Abas Miskərli isə “İpək Yolu Sığorta Kəməri: Türk dünyası sığorta bazarlarının inteqrasiyası” panelində iştirak edib.
Panel müzakirələrində Azərbaycanda sığorta sektorunda həyata keçirilən islahatlar, əldə olunan nəticələr və qarşıdakı dövr üçün prioritet istiqamətlər barədə məlumat verilib. Əsasən sual-cavab formatında keçirilən müzakirələrdə Azərbaycan nümayəndə heyətinin təqdim etdiyi məlumatların Forum iştirakçıları tərəfindən maraqla qarşılandığı bildirilib.
Türk Dünyası Sığorta Birliyinin rolu müzakirə olunub
Müzakirələr zamanı Türk Dünyası Sığorta Birliyinin türk dövlətlərinin sığorta bazarlarının inkişafındakı roluna da diqqət yetirilib.
Birliyin üzv ölkələrin sığorta bazarları arasında əməkdaşlığın və inteqrasiyanın gücləndirilməsi, təcrübə mübadiləsinin genişləndirilməsi və ortaq təşəbbüslərin həyata keçirilməsi baxımından yaratdığı imkanlar vurğulanıb.
Eyni zamanda, türk dövlətlərinin sığorta sektorları arasında əlaqələrin daha da dərinləşdirilməsinin regional sığorta ekosisteminin inkişafına töhfə verə biləcəyi qeyd olunub.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
