Sığortalı Azərbaycan xəbər verir ki, İcbari Sığorta Bürosu (İSB) rəsmi internet səhifəsində “Sığorta haqqını hesabla” adlı yeni rəqəmsal xidməti istifadəyə verib, Şəxsi Kabineti isə yeniləyib.
İcbari Sığorta Bürosu (İSB) sığorta xidmətlərinin rəqəmsallaşdırılması və vətəndaşların sığorta məlumatlarına çıxış imkanlarının genişləndirilməsi istiqamətində yenilikləri davam etdirir.
Yeni “Sığorta haqqını hesabla” funksiyası vətəndaşlara avtonəqliyyat vasitəsi sahiblərinin mülki məsuliyyətinin icbari sığortası üzrə sığorta haqqını onlayn hesablamaq imkanı yaradır. Bununla istifadəçilər sığorta müqaviləsi bağlamazdan əvvəl ödəyəcəkləri məbləği öyrənə və hesablamaya təsir edən əsas göstəricilərlə tanış ola bilərlər.
Xidmətdən İSB-nin www.isb.az rəsmi internet səhifəsindəki Şəxsi Kabinet vasitəsilə yararlanmaq mümkündür. Bunun üçün istifadəçilər “Daxil ol” bölməsindən myGov ID, SİMA İmza, Asan İmza və ya elektron imza (e-imza) vasitəsilə kabinetə daxil olmalıdırlar.
Daha sonra nəqliyyat vasitəsinin dövlət qeydiyyat nişanı və qeydiyyat şəhadətnaməsinin nömrəsi daxil edilir. Sığorta haqqının hesablanması üçün zəruri məlumatlar aidiyyəti dövlət qurumlarının və İSB-nin informasiya sistemlərindən avtomatik əldə olunur.
Hesablama başa çatdıqdan sonra istifadəçiyə yekun sığorta haqqı ilə yanaşı, məbləğin formalaşmasına təsir edən əsas göstəricilər, o cümlədən sığortalı günlərin sayı və tətbiq olunan sığorta tarixçəsi əmsalı barədə məlumat təqdim edilir.
Bununla yanaşı, İSB-nin Şəxsi Kabineti də yenilənib. Kabinetin ekran görünüşü və funksional imkanları təkmilləşdirilib. Artıq sığortalılar qüvvədə olan icbari sığorta müqavilələri barədə məlumatları daha rahat əldə edə, həmçinin müqavilələrin bitmə tarixlərini öyrənə bilərlər.
Aparılan yeniliklər sığorta məlumatlarına çıxışı asanlaşdırmaqla yanaşı, vətəndaşların rəqəmsal xidmətlərdən istifadəsini də genişləndirməyə yönəlib.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında məlumatlar təqdim olunur.
