Sığortalı Azərbaycan xəbər verir ki, 21- 23 noyabr tarixlərində Ankara Universiteti, Ankara Hacı Bayram Vəli Universiteti və Türkiyə Cümhuriyyəti Cumhurbaşkanlığının Milli Kitabxanasında PAŞA Həyat ilə İRS Nəşriyyat evinin birgə əməkdaşlığı çərçivəsində ərsəyə gələn “Salam, Azərbaycan!” və “Qarabağın Qara Kitabı” kitablarının türk dilində nəşrləri təqdim olunub.
Hər 3 gün keçirilən təntənəli tədbirlərdə sözügedən kitabların təqdimatı ilə yanaşı Azərbaycan mədəniyyəti, tarixi və incəsənətini əks etdirən fotolardan ibarət sərginin açılışı olub, həmçinin zəngin milli musiqi proqramı təqdim olunub
Tədbirlərdə açılışdan sonra Azərbaycanın Türkiyədəki səfiri Rəşad Məmmədov, Türkiyə Prezidentinin Baş müşaviri Yalçın Topçu, PAŞA Həyat şirkətinin sədri Niyaz İsmayılov, İRS Nəşriyyat evinin baş redaktoru Musa Mərcanlı, Türkiyə Prezidenti yanında Təhlükəsizlik və Xarici Siyasət Şurasının üzvü Aygün Attar, digər rəsmilər və universitet rekrotları çıxış etmişlər. Qonaq qismində tədbirlərə Azərbaycanın Ankaradakı Səfirlik nümayəndələri, görkəmli ziyalılar, nüfuzlu rəsmilər, universitet rektorları, professor, müəllim və tələbə heyəti və digər qonaqlar da təşrif buyurmuşdular.
“PAŞA Həyat Sığorta” ASC-nin sədri Niyaz İsmayılov və İRS nəşriyyat evinin baş redaktoru Musa Mərcanlı təqdim olunan kitablar və jurnalların Azərbaycan həqiqətləri ilə bağlı oxuculara geniş məlumat verəcəyi haqda bəhs ediblər, həmçinin kitabların ərsəyə gəlməsi ideyası və prosesi barədə məlumat veriblər. Azərbaycanın qardaş ölkədəki səfiri Rəşad Məmmədov çıxış edərək türk dilində çap edilmiş “Salam, Azərbaycan!” və “Qarabağın Qara Kitabı” adlı kitabların türk ictimaiyyətinə təqdim olunmasının əhəmiyyətini qeyd edib.
23 noyabr tarixində Türkiyə Cümhuriyyəti Cumhurbaşkanlığı Milli Kitabxanasında baş tutmuş tədbirdə PAŞA Həyat və “İRS” nəşriyyat evi tərəfindən Kitabxanaya Azərbaycanla bağlı çox sayda kitablar hədiyyə edilib.
Qeyd edək ki, “Qarabağın Qara kitabı”nda Azərbaycanın ayrılmaz bir parçası olan Qarabağın Ermənistan tərəfindən işğalı nəticəsində təbiətinə, yaşayış fonduna, əmlaklara, tarixi abidələrə, mədəniyyət nümunələrinə vurulmuş ziyan və onun həcmi barədə bəhs edilir, ”Salam, Azərbaycan!” kitabı isə ümumi Azərbaycan tarixi və mədəniyyətinə həsr olunub. Sözügedən kitablar “PAŞA Həyat Sığorta” ASC və “IRS Publishing House”un 2013-cü ildən birgə həyata keçirdiyi “İrs” silsiləsi layihəsi çərçivəsində ərsəyə gəlib.
Ümumilikdə əməkdaşlıq çərçivəsində indiyədək “Qədim qalanın yuxuları”, “Qobustan – minilliklər kitabı”, “Təbrizin sehrli nağılları”, “Qədim və gözəl Qarabağ”, “Məftun edən şəhər”, “Bakı simfoniyası”, “Daş keşikçilər”, “Qarabağ – əsrlərin salnaməsi”, “Gəncə – Nizami yurdu”, ”Zəfər Salnaməsi”, “Salam, Azərbaycan!” və “Şəki – Gözəlliyin Sehri”, “Qarabağın Qara kitabı” və “Qarabağ – qələbəyə doğru” kitablar işıq üzü görüb.
Sığortalı Azərbaycan – https://sigortaliazerbaycan.com/ – Sigorta Medya Nəşridir – bütün hüquqlar qorunur
Sigorta Medya Türkiye – www.sigortamedya.com.tr
– Sığorta növləri və ümumi sığorta fəaliyyətləri haqqında ətraflı məlumat almaq üçün veb saytımıza daxil ola bilərsiniz. Hər gün daha inkişaf etmiş cəmiyyət olmaq məqsədi ilə addımlar atırıq. Sığorta xidmətlərinin nə qədər vacib olduğunu izah etmək, üçün ən son məlumat ları və xəbərləri daxil edirik. Faydalanmaq istədiyiniz sığorta növləri haqqında ətraflı məlumat əldə etmək üçün saytımıza nəzər yetirə bilərsiniz. Saytımız vasitəsi ilə eyni zamanda həm fərdi həm korporativ sığorta növləri ilə tanış ola və bütün suallarınıza dərhal cavab ala bilərsiniz. Bizim saytımızın köməyi ilə şəxsi pensiya və həyat sığortası ilə bağlı maraqlandığınız bütün suallara cavab tapa bilərsiniz.
