Aqrar Sığorta Fondunun (ASF) fəaliyyətinin səmərəliliyi və nəticəliliyi ilə bağlı auditin nəticələri Hesablama Palatasının Kollegiya iclasında müzakirə olunub.
Sığortalı Azərbaycan xəbər verir ki, növbəti Kollegiya iclasında auditor Cavid Bayramovun təqdim etdiyi “Aqrar sığorta fəaliyyətinin səmərəliliyinin və nəticəliliyinin qiymətləndirilməsinin auditinin nəticələrinə dair Auditor hesabatı”na baxılıb.
Aqrar Sığorta Fondunun fəaliyyəti ilə bağlı audit hesabatı
İclasda Azərbaycanın kənd təsərrüfatı nazirinin müavini Elçin Zeynalov, Aqrar Sığorta Fondunun İdarə Heyətinin sədri Fuad Sadıqov və digər məsul şəxslər iştirak ediblər.
Müzakirələr zamanı audit nəticələrinin aqrar sığorta sahəsində fəaliyyətin təkmilləşdirilməsinə töhfə verəcəyi vurğulanıb. İştirakçılar audit çərçivəsində irəli sürülən təklif və tövsiyələrin nəzərə alınacağını bildiriblər.
Hesabat təsdiqlənib
Müzakirələrin yekununda aqrar sığorta fəaliyyətinə dair auditor hesabatının təsdiq edilməsinə qərar verilib.
Bununla yanaşı, audit zamanı müəyyən edilmiş nöqsanların aradan qaldırılması məqsədilə audit olunan qurum tərəfindən zəruri tədbirlərin görülməsi barədə də qərar qəbul edilib.
Əmlak vergisi ilə bağlı audit də müzakirə olunub
Kollegiya iclasında daha sonra “Əmlak vergisinin proqnozlaşdırılması, hesablanması və yığılmasının auditinin nəticələrinə dair Auditor hesabatı” da müzakirə edilib.
Müzakirələrin sonunda bu auditor hesabatının da təsdiq olunmasına, həmçinin aşkar edilmiş nöqsanların aradan qaldırılması üçün audit olunan qurum tərəfindən müvafiq tədbirlərin görülməsinə qərar verilib.
İclasın sonunda gündəlikdə nəzərdə tutulan digər cari məsələlərə də baxılıb.
Müəllif Hüquqları
Sığortalı Azərbaycan – “Sigorta Medya” nəşridir. Bütün hüquqlar qorunur. Platformamız vasitəsilə fərdi sığorta və korporativ sığorta növləri, o cümlədən həyat sığortası və könüllü pensiya sığortası haqqında ən son xəbərləri izləyə bilərsiniz. Regionun sığorta gündəmini izləmək üçün Sigorta Medya Türkiye səhifəsini də ziyarət edə bilərsiniz.
